.png "Казахский")
Қарағанды қаласындағы Назарбаев Зияткерлік мектебінің оқушылары Жас геологтардың республикалық далалық олимпиадасында ІІІ орынға ие болды.
13 маусымда Қонаев қаласында Жас геологтардың І республикалық далалық олимпиадасы мәресіне жетті. 9-11 сынып оқушыларынан тұрған 16 команда палеонтология, гидрология, радиометрия, минералогия мен петрография және пайдалы қазбалар геологиясы сияқты түрлі пәндер бойынша бақ сынасты. Қазақстанның барлық өңірінен жиналған 200 бала жеңімпаз атағына таласты.
Палеонтология пәні бойынша жарыстарда жеке/командалық сынақтардың нәтижелері бойынша І орынды 8-сынып оқушысы Диас Аманжол иеленді. Зияткер геологиялық олимпиада тарихындағы Қазақстан-Британ техникалық университетіне оқуға грант алған ең жас геолог деп танылды. Қазір ол 14 жаста.
– Бұл Мен үшін үлкен тәжірибе болды. Командамен бірлесіп өзіміздің мықты жақтарымызды анықтай алдық. ҚБТУ грантын жеңіп алғанымды білгенде қатты таң қалдым. Мен де, ата-анам да бұл мүмкіндікке өте қуаныштымыз», – деп бөлісті Диас.
«Далалық маршрут» санатында Камила Тазабекова, Алдияр Мубарекшенов пен Артур Штро ІІ орынды иеленді. Қауіпсіздік техникасының негіздері бойынша Ева Дмитриева, Асия Исламярова мен Арнелла Төлеген ІІ орынды иеленді. «Түпшаймалық сынамалау» бойынша Ақылбек Жұмаш 5-орынға ие болды.
Ғылыми және шығармашылық байқауларда «Геология және Біз» көрмесі үшін «Сарыарқа» командасы 2-орыннан көрінді. «Геологиялық ескерткіш» санатында Ева Дмитриева мен Камила Тазабекова ІІ орынға ие болса, Асия Исламярова мен Арнелла Төлеген геологиялық есеп бойынша ІІ орынға лайық деп танылды. Сонымен қатар Асия Исламярова фотобайқауда ІІ орын, ал Ева Дмитриева тастан жасалған бұйымдар үшін ІІІ орынды иеленді.
Жалпы командалық есепте «Сарыарқа» командасы ІІІ орынды иеленді (қола жүлде). Команда жаттықтырушысы – география пәнінің мұғалімі Жанар Бәйметова.
– Олимпиада 7 күнге созылды, әр күн ерекше әрі қызықты өтті. Біздің әрқайсымызға жүктелген жарыстарға қатысып, мол тәжірибе жинадық, сонымен қатар білімімізді тексере алдық. Жанар Рахматулқызының басшылығымен бірліктің, сенім мен табандылықтың арқасында қола жүлдеге ие болдық. Бұл тек бастамасы деп санаймын, әрі қарай өз машықтарымызды жетілдіруге бар күшімізді салатын боламыз, – деп бөлісті команда капитаны Камила Тазабекова.
Мектеп әкімшілігі консультациялық қолдау көрсеткен «Центргеолсъемка» ЖШС-іне, Қарағанды медицина университеті мен Симмуляциялық және білім беру технологиялары орталығына және демеушілік білдірген «ALEMPROM» ЖШС-іне алғыс білдіреді.
