Үздіктер ұстазы: NIS мұғалімі жаттықтырған ұстаздар 4 мәрте топ жарды

Ақтөбедегі NIS мұғалімі Базаргүл Срымова – төрт бірдей «үздік ұстаздың» бапкері.

Ол 10 жылдан бері республикалық «Үздік дене шынықтыру педагогі» байқауына ұстаздар даярлаумен айналысып келеді. Тәжірибелі педагог Базаргүл Жикебайқызы жаттықтырған қатысушылар қашан да жүлделі оралады.

Аталмыш дода алғаш рет 2014 жылы өткізілді. Сол жылы республикалық байқауда Ақтөбе облысының абыройын қорғайтын ұстазға жетекшілік ету Базаргүл Срымоваға сеніп тапсырылды. Содан бері артылған үміт ақталмай қалған емес.

2014 жылы Щучинскте өткен байқауда Ақтөбе қаласындағы №51 гимназияның мұғалімі Нұрғали Сарыпбеков гран-при жеңіп алды. «Үздік дене шынықтыру педагогі» атағын алғаш иеленген ұстаз бүгінде NIS ұжымында қызмет етеді. Нұрғали Сарыпбеков зияткерлерді спортқа баулуда елеулі еңбек сіңіріп келеді.

Базаргүл Срымова шынықтырған шәкірттердің келесі легі де жүлделі орыннан қалыс қалмады. Атап айтсақ, 2019 жылы Ақтөбе қаласындағы №51 гимназияның ұстазы Самғат Ескарин 3-орынды, ал 2023 жылы Шалқар ауданының мұғалімі Әлібек Пұсырманов 2-орынды иеленді.

Жуырда ғана Республикалық «Үздік дене шынықтыру педагогі» сайысы кезекті рет өткізілді. Бұл жолы да Базаргүл Срымова жетекшілік еткен Мартук ауданының дене шынықтыру мұғалімі Тимур Жиенбаев гран-при иеленді.