Қарағанды қаласындағы Назарбаев Зияткерлік мектебінің 2020 жылғы түлегі Темірлан Нурлигенов Facebook (Meta) компаниясының Лондондағы кеңсесінде тағылымдамадан өтті. 3 ай бойы Темірлан әлемдік компанияның ішкі жұмысымен танысып, тәжірибе жинады.
– Тағылымдама кезінде мен команданың жұмысын жеңілдетуге бағытталған ішкі құралды әзірлеумен айналыстым. Бұл тәжірибе маған өзімді үлкен компания мүшесі сезінуге мүмкіндік беруімен қатар, осы салада дамуға талпыныс берді, – деп бөлісті Темірлан.
Темірлан қазіргі таңда Қазақстан-Британ техникалық университетінің 3-курс студенті. Оқумен қоса жұмысты да қатар алып жүрген жас жігіт Kaspi компаниясында әзірлеуші болып қызмет етуде. Темірланның мақсаты – оқуын аяқтап, ірі IT компанияда қызмет ету.
Сонымен қатар ол компьютер ғылымдарына қызығатын оқушыларға қазірден бастап IT маманға қажетті машықтарды дамытуға кеңес берді.
– Оқушыларға C++, Java, Python сияқты бағдарламалау тілдерінің негізін білу болашақта үлкен көмек болады. Деректер алгоритмі мен құрылымын оқып-үйрену арқылы түрлі тағылымдамалардан өтуге және бәсекеге қабілетті маман болуға мүмкіндік аласыз. Бұл мақсатта Leetcode және codeforces ресурстары пайдалы болады. Барлық мектеп оқушыларына кеңесім – қызықтырған саланы анықтап, сол бойынша бейінді пәндерге ерекше көңіл бөлу. Кәсіп нарығын бақылап таңдау жасаған жөн, – дейді ол.
Естеріңізге салсақ, Темірлан мектеп жылдарында математика бойынша көптеген халықаралық және республикалық олимпиадаларда жеңіс төрінен көрінген болатын.
– Сапалы және бірегей білім алған оқушы ретінде Қарағандыдағы NIS-ке үлкен алғысымды білдіргім келеді. Өйткені, бұл оқу орны маған үздіксіз дамуды үйретіп, сол арқылы 19-20 жасымда Yandex, Kaspi және Meta сияқты компанияларда бағымды сынауға мүмкіндік берді. Бұл жерде оқушылар білім алып қана қоймай, еңбекқорлық пен табандылықты үйренеді. Мектеп әлі де менің екінші үйімдей, – дейді Темірлан.
Темірланға жаңа биіктерді бағындырып, кәсіпте табысқа жетуге тілектеспіз!