Назарбаев Зияткерлік мектебінің «Мейірім көпірі» клубының еріктілері мен педагогтар Қарағанды қаласының Даму мүмкіндігі шектеулі балаларға арналған балалар үйінде әлеуметтік жоба аясындағы жұмысын бастады.
Жақында 9-11 сынып оқушыларынан құралған клуб еріктілері информатика пәні мұғалімдері Айгерім Абдикашева, Людмила Устинова және клуб жетекшісі Гүлнара Сеитованың басшылығымен ұйымдастырушылық-ақпараттық кездесу өткізді. Мұғалімдер балалар үйінің тәрбиеленушілеріне курс жоспары мен мазмұнын таныстырды, сонымен қатар сабақ кестесі, топтық жұмыс жайлы айтып, сұрақтарға жауап берді.
Жобаның бастамашысы және грант иегері 12-сынып оқушысы Томирис Мадиева клуб еріктілерімен бірлесіп танысу және ұйымдасу тренингтерін өткізді. Балалар бір-бірімен жақын танысып, қызығушылықтары мен арман-мақсаттары жайлы ой бөлісті.
Мамыражай кездесу қатысушылардың бірігіп, гитарамен ән салуымен аяқталды. Бұл қатысушылар арасында достық қарым-қатынас қалыптастырып қана қоймай, жоба аясында өтететін алдағы сабақтарға бірлесіп кірісуге ықпал етері сөзсіз.
Жоспар бойынша оқыту сабақтары алдағы сенбіде басталмақ. Осы аптада балалар үйінде Zhas project-2022 ұйымдастырушылары грант бойынша ұсынған қажетті компьютерлік жабдықтар орнатылатын болады.
– Осы жобаның арқасында еріктілер Peer to Peer оқыту әдісі бойынша жұмыс істеп, әлеуметтік тәжірибе жинамақ. Белсенді өмірлік ұстанымы бар, қоғамға және өз еліне қызмет етуге ниеттенген тұлға ретінде дамитын болады, – деп атап өтті клуб жетекшісі Гүлнар Сейітова.
Жобаны сәтті жүзеге асыруға тілектеспіз!